මහරගම, පමුණුව දුම්රියපොළ මාවතේ නිවාස සංකීර්ණයක ගෙල වැලලාගෙන කාන්තාවක් මියගොස් තිබෙනවා. පොලීසිය සඳහන් කළේ, අදාළ කාන්තාවගේ මරණය පිළිබඳ මේ වනවිට පරීක්ෂණ ආරම්භ කර ඇති බවයි.

එලෙස මියගොස් ඇත්තේ, අඹගස්වැව, හිරියාල, තරණගොල්ල ප්‍රදේශයේ පදිංචිව සිටි අභයකෝන් මුදියන්සේලාගේ ඉවන්තිකා කුමාරි නැමති 28 හැවිරිදි නර්තන ශිල්පිනියක් බවයි පොලීසිය සඳහන් කරන්නේ.

ඇය ගෙල වැලලාගෙන සිටි ලණුවෙන් මුදාගෙන පුද්ගලයෙකු විසින් රෝහල රැගෙන ගිය බවට ඊයේ රාත්‍රියේ පොලීසියට ලද දුරකථන ඇමතුමක් මත පරීක්ෂණ ආරම්භ කර ඇත.

එම පැමිණිල්ල අනුව වහා ක්‍රියාත්මක වූ ස්ථානාධිපතිවරයා එම නිවාස සංකීර්ණයට ගොස් විමර්ශන ආරම්භ කර නුගේගොඩ අපරාධ ස්ථාන පරීක්ෂණාගාරයේ නිලධාරීන් ද කැඳවා විශේෂඥ විමර්ශනයක් ද ආරම්භ කර ඇත.

ගෙල වැල ලාගෙන සිටි කාන්තාව කළුබෝවිල රෝහලට රැගෙන ගිය පුද්ගලයා එම රෝහලේ සිටින බවට පොලීසියට ලද තොරතුරක් අනුව රෝහල කරා පොලිස් නිලධාරියෙකු පිටත්කර එම පුද්ගලයා ද නිවාස සංකීර්ණය වෙත රැගෙන ඒමට කටයුතු කර තිබූ බව පොලීසිය පැවසුවේ.

එම කාන්තාව රෝහලට රැගෙන යන විටත් මිය ගොස් තිබූ බවට එම පුද්ගලයා ප්‍රකාශයක් ලබාදී තිබේ.

නිකවැරටිය මිල්ලගොඩ ප්‍රදේශයේ පදිංචි වයස අවුරුදු 40ක් වන එම ව්‍යාපාරිකයා දරුවන් තිදෙනකු සිටින විවාහක පුද්ගලයෙක් බවයි පොලීසිය සඳහන් කර සිටියේ.

එම පුද්ගලයා මියගිය කාන්තාව සමග මීට මාස දහයකට පමණ පෙර අනියම් ඇසුරක් පවත්වාගෙන ගොස් තිබූ අතර එකී කාලයේ සිට මාසිකව රුපියල් 30,000 ක කුලී මුදලකට සුඛෝපභෝගී නිවාස සංකීර්ණයෙන් නිවසක් ලබාගෙන එම කාන්තාව පදිංචිකරවා ඇතැයි අනාවරණය වී තිබේ.

එම පුද්ගලයා දින කිහිපයකට වරක් එම නිවසට පැමිණීම පුරුද්දක් කරගෙන තිබූ බව ද වාර්තා වේ.

මියගොස් සිටින කාන්තාව ද විවාහයෙන් දික්කසාද වූ තැනැත්තියක් බවත් මීට වසර 5කට පෙර සිය ගම් ප්‍රදේශයෙන් පිටත්ව කොළඹ ප්‍රදේශයේ විවිධ රැකියාවන්වල නිරත ව සිට ඇති බවත් පොලිස් විමර්ශනවලදී අනාවරණය වී ඇත.

අදාළ කාන්තාව ගේ මරණය සම්බන්ධයෙන් පශ්චාත් මරණ පරීක්ෂණයක් පැවැත්වීමට නියමිතව ඇත.

 

මෙන්න බලන්න තවත් පුවත්