මැලේසියාවේ සේවය කරනු ලබන තම බිරිඳව මෙරටට ගෙන්වා ගැනීම සඳහා සත් හැවිරිදි පිරිමි දරුවාට පහරදෙමින් බිරිඳට වීඩියෝ කෝල් පෙන්වූ 25 හැවිරිදි පියකු පෙරේදා (4 දා) නිදහස් දිනයදා අත්අඩංගුවට ගත් බව කොස්මෝදර පොලිසිය පවසයි.
මෙම සැකකාර පියා විසින් එම දරුවාට පහරදෙන ආකාරය වීඩියෝ තාක්‍ෂණය ඔස්සේ සිය බිරිඳට දැකීමට සලස්වා ලංකාවට පැමිණෙන ලෙස තර්ජනය කර ඇතැයි හෙළිවූ බව පොලිසිය කියයි. පහර කෑමට ලක්වූ දරුවා කොස්මෝදර රෝහලට ඇතුළත් කර තිබේ.
සැකකාර පියා මැලේසියාවේ සිටින සිය බිරිඳට මෙරටට පැමිණෙන ලෙස පවසමින් කාලයක සිට බහින්බස් වී ඇතැයි හෙළිවූ බවද පොලිසිය කියයි. දරුවා රැකබලාගෙන ඇත්තේ මිත්තනිය විසින් බවද හෙළිවිනැයි පොලිසිය කියයි. සැකකාර පියා මාතර මහෙස්ත්‍රාත් අධිකරණයට ඉදිරිපත් කිරීමට නියමිතව තිබිණි.
මේ පිළිබඳව කොස්මෝදර පොලිසියේ ස්ථානාධිපති ප්‍රධාන පොලිස් පරීක්ෂක ඉන්ද්‍රජිත් මහතාගේ උපදෙස් මත අපරාධ විමර්ශන අංශයේ ස්ථානාධිපති පොලිස් පරීක්ෂක විජිතානන්ද මහතාගේ මෙහෙයවීමෙන් නිලධාරීහු කණ්ඩායමක් වැඩිදුර පරීක්‍ෂණ සිදුකරති.
ප්‍රදීප් ප්‍රසන්න සමරකෝන් සහ චන්ද්‍රදාස කොඩිතුවක්කු – මාතර
පැරණි පුවත් – මට තවමත් විශ්වාස කරන්න බෑ… තාත්තා තමයි මේ යෝජනාව ගෙනාවේ – පියා නිසා මිලියන ගණනක වාසනාව දෝතට ගත් සරසවි දියණිය
ඔබත් ඉඳහිටක හෝ වාසනාව උරගා බලන්න කටයුතු කරනවා නේද.
ලොතරැයි දිනුමක් එහෙම ලැබෙයි කියන බලාපොරොත්තුවෙන් කෙරෙන මිලදී ගැනීම් එහෙම…
ලෝකෙ වටේ රස කතා හොයාගෙන යන අපිට ඔන්න එහෙම වාසනාව ඕනිවටත් වඩා ඉතිරුණු කතාවක් ගැන අහන්න ලැබුණා.
විශේෂත්වය වන්නේ මේක ඇයගේ පළවෙනි ලොතරැයි මිලදී ගැනීම වීමයි !!!
තනිකරම වාසනාව තමයි ඉතින්…
කතාව අහලා ඉන්නකෝ,,,,
කැනේඩියානු යෞවනියකට තමයි මේ විදියට සිය පළමු උත්සාහයේදීම ඩොලර් මිලියන 48ක ලොටෝ ජැක්පොට් ( lotto jackpot ) එකක් දිනා ගැනීමේ වාසනාව හිමිවූ බවට විදෙස් මාධ්‍යය තොරතුරු වාර්තා කරන්නේ.
ඇය නමින් ජුලියට් ලැමූර් ( Juliette Lamour ).
ඇයගේ මූල්‍ය උපදේශකයා වන්නේ ඇයගේ තාත්තා.
තවමත් 18 වන වියෙහි පසුවන ඇය මෙතරම් විශාල ත්‍යාගයක් දිනාගත් ලාබාලතම කැනේඩියානුවා බවට පත්වන්නේ වාසනාවත් එක්කම වාර්තාවක් ද තබමින්.
සිතාගත නොහැකි තරම් ධනයක් ලැබුණද, ජුලියට් තම අධ්‍යාපන කටයුතු අත්නොහැර ඉදිරියටම යාමට අදහස් කරන්නේ තරුණ තරුණියන්ට ආදර්ශයක් ලබාදෙමින්.
විශ්වවිද්‍යාල ශිෂ්‍යාවක වන ඇය සිය අධ්‍යාපනය අවසන් කර වෛද්‍යවරියක් වීමට සැලසුම් කර තිබෙන බවයි වාර්තා වන්නේ.
“මම ඇඬුවා – සතුටු කඳුළු – ඇත්ත වශයෙන්ම, මගේ පළමු ලොතරැයි ටිකට් පතේ ගෝල්ඩ් බෝල් ජැක්පොට් එක වැදුණු බව මට තවමත් විශ්වාස කරන්න බෑ….” ඇය පවසනවා.
ඇය පවසන්නේ ජනවාරි 7 දිනුම් ඇදීමෙන් තම උපන් නගරයේ කෙනෙකු දිනූ බවට ආරංචිය ලැබෙන තුරුම ලොතරැයි ටිකට් පත ගැන ඇයට සියල්ල අමතකව තිබූ බවයි.
ජංගම දුරකථනය හරහා ටිකට් පත පරීක්ෂා කිරීමට ගිය විට, එහි තිරය මත “Big Winner” ලෙස දැක්වීම අදහාගත නොහැකි වූ බව ඇය පවසනවා.
“මගේ සගයා විශ්වාස කළ නොහැකි ලෙස දණින් වැටුණා,” ජුලියට් පවසනවා.
“හැමෝම කෑ ගැහුවේ මම ඩොලර් මිලියන 48ක් දිනුවා කියලා.”
ජුලියට් පැවසුවේ ඇයගේ මුදල් කළමනාකරු වන පියාගේ සහාය ඇතිව මුදලින් වැඩි කොටසක් “ප්‍රවේශමෙන්” ආයෝජනය කරන බවයි.
ලොතරැයි මිලදී ගැනීමේ අදහස ඇගේ පියාගේ එකක් වීමත් සුවිශේෂීයි.
ප්‍රදානයන් හෝ ණය ගැන කරදර නොවී වෛද්‍යවරියක් වීමේ තම සිහිනය සැබෑ කර ගැනීම සඳහා මෙම මුදල්වලින් කොටසක් ආයෝජනය කිරීමට සැලසුම් කරන බවයි ඇය පවසන්නේ.
“මට විවිධ රටවල් ගැන තොරතුරු සෙවීමට, ඔවුන්ගේ ඉතිහාසය සහ සංස්කෘතිය අධ්‍යයනය කිරීමට, ඔවුන්ගේ ආහාර අත්හදා බැලීමට සහ ඔවුන්ගේ භාෂාවට සවන් දීමට අවශ්‍යයි.” ඇය සිය අනාගත අපේක්ෂාවන් ගැනත් එලෙස සඳහන් කර තිබුණා.
“මුදල් ඔබව නිර්වචනය නොකරයි, ඔබ කරන කාර්යය ඔබව නිර්වචනය කරයි.” ඒ ඇයගේ ආදර්ශමත් පාඨයයි.
