ඊයේ (04) දින මහරගම ජාතික තරුණ සේවා සභා පරිශ්‍රයේදී ස්වාධීන පක්ෂ එකමුතුවේ සුසංයෝගයෙන් පැවති මංගල මහා සමුළුවේදී ‘උත්තර ලංකා සභාගය’ ජනගත කිරීම සිදු කොට තිබේ.

උත්තර ලංකා සභාගයේ සභාපතිවරයා ලෙස ජාතික නිදහස් පෙරමුණේ නායක හිටපු අමාත්‍ය විමල් වීරවංශ මහතා ද ලේකම්වරයා ලෙස ශ්‍රී ලංකාවේ කොමියුනිස්ට් පක්ෂයේ ප්‍රධාන ලේකම් විශේෂඥ වෛද්‍ය ජී. වීරසිංහ මහතා ද පත්ව තිබේ.

උත්තර ලංකා සභාගයේ ජාතික සංවිධායක ලෙස ප්‍රජාතන්ත්‍රවාදී වාමාංශික පෙරමුණේ නායක, හිටපු අමාත්‍ය වාසුදේව නානායක්කාර, උත්තර ලංකා සභාගයේ නියෝජ්‍ය සභාපතිවරුන් ලෙස පිවිතුරු හෙළ උරුමයේ නායක, හිටපු අමාත්‍ය උදය ගම්මන්පිල සහ ලංකා සම සමාජ පක්ෂයේ ප්‍රධාන ලේකම් හිටපු අමාත්‍ය, මහාචාර්ය තිස්ස විතාරණ, උත්තර ලංකා සභාගයේ නියෝජ්‍ය ලේකම්වරයා ලෙස යුතුකම ජාතික සංවිධානයේ සභාපති පාර්ලිමේන්තු මන්ත්‍රී ගෙවි‍දු කුමාරතුංග යන මහත්වරුන් ද ප්‍රකාශයට පත් කෙරිණි.

එසේ ම, උත්තර ලංකා සභාගයේ අනුශාසක ධූරයට විජය ධරණී ජාතික සභාවේ සභාපති පාර්ලිමේන්තු මන්ත්‍රී අතුරලියේ රතන හිමියෝ පත්ව සිටිති.

ඊට අමතරව, ස්වාධීන පක්ෂ එකමුතුවේ සියලු පක්ෂ නියෝජනය වන පරිදි විධායක සභිකවරුන් ද පත්ව සිටින අතර ජාතික නිදහස් පෙරමුණේ ජාතික සංවිධායක හිටපු රාජ්‍ය අමාත්‍ය ජයන්ත සමරවීර, එම පක්ෂයේ ප්‍රචාරක ලේකම් මොහොමඩ් මුසම්මිල්, ශ්‍රී ලංකාවේ කොමියුනිස්ට් පක්ෂයේ උප සභාපති වීරසුමන වීරසිංහ යන පාර්ලිමේන්තු මන්ත්‍රිවරු ද ඒ අතර වෙති.

මෙම මංගල මහා සමුළුවට පැමිණි පිරිස පිළිගැනීම පාර්ලිමේන්තු මන්ත්‍රී වීරසුමන වීරසිංහ මහතා විසින් සිදුකරන ලද අතර ඉන් පසුව සිදු වූයේ සභාගයේ ප්‍රතිපත්ති ප්‍රකාශයට ස්වාධීන පක්ෂ එකමුතුවේ නායකයන් විසින් අස්සන් තැබීම ය. ඉන් අනතුරුව සභාගයේ නාමය සහ නිලධාරී මණ්ඩලය ප්‍රකාශයට පත් කෙරිණි. සමුළු සාමාජිකත්වය ප්‍රතිඥාවක් ලබා දීම සහ මංගල සමුළුව සඳහා නිර්මාණය වූ ගීතය ‘සිත් තුළ පිපෙන සජ්ජන පියුම’ ගීතයද ජනගත කිරීම ද මෙහිදී සිදු විය. ඊට අමතරව සමුළුව සංස්කෘතිකාංග කිහිපයකින් ද වර්ණවත් විය.

මෙම අවස්ථාවට සුබ පැතුම් රැගෙන ‘නිදහස’ ජනතා සභාව නියෝජනය කරමින් හිටපු අමාත්‍ය ඩලස් අලහප්පෙරුම, ශ්‍රී ලංකා නිදහස් පක්ෂය නියෝජනය කරමින් එහි උපසභාපති තිලංග සුමතිපාල යන මහත්වරුද චීන, රුසියානු, ඉන්දීය, ඉරාන, වියට්නාම තානාපති කාර්යාලයන්හි රාජ්‍යතාන්ත්‍රික නිලධාරීන් පිරිසක් ද සහභාගී වූහ.

newsmania.lk

මෙන්න බලන්න තවත් පුවත්