ලබන පළමුවැනිදා සිට සේවක අර්ථසාධක අරමුදලේ (EPF) ප්‍රතිලාභ ලබාගැනීම සඳහා නව වැඩපිළිවෙළක් ක්‍රියාත්මක කරන බව කම්කරු සහ විදේශ රැකියා අමාත්‍ය මනූෂ නානායක්කාර මහතා සදහන් කරයි.

සේවක අර්ථසාධක අරමුදලේ ප්‍රතිලාභ ලබාගැනීමට සහ සේවා යෝජක ලියාපදිංචිය සදහා දිනයක් සහ වේලාවක් 1958 අංකයට අමතා හෝ www.appointment.labourdept.gov.lk යොමුව මගින් ලබාදීමට කටයුතු කළ හැකි අතර පෝලිම්වල රැදී නොසිට කම්කරු දෙපාර්තමේන්තුව හරහා ලබාගතයුතු සේවාවන් ලබාගැනීමේ හැකියාව සලසා දෙන බව අමාත්‍යවරයා පෙන්වා දී තිබේ.

ඒ අනුව එළැඹෙන 01දායින් පසු දිස්ත්‍රීක් කාර්යාල 40, උපකාර්යාල 17 සහ කලාප කාර්යාල 11 වෙතින් ද මෙතෙක් නාරාහේන්පිට කම්කරු දෙපාර්තමේන්තු ප්‍රධාන කාර්යාලයට පමණක් සීමා වී තිබූ මාර්ගගත පහසුකම ලබා ගැනීමට හැකි බව කම්කරු කොමසාරිස් ජනරාල් ප්‍රභාත් චන්ද්‍රකීර්ති මහතා සඳහන් කරයි.

කාර්යාලයට පැමිණ අංක ලබා ගැනීමේ කටයුතු වෙනුවට මාර්ගගත ව වේලාව වෙන්කර ගත යුතු බවත් එසේ නොමැති නම් සේවා පහසුකම් ඉටුකර ගැනීමේ දී දුෂ්කරතා මතුවිය හැකි බවත් පෙන්වා දුන් ඔහු අධීක්ෂණ කාලසීමාවකින් අනතුරු ව මාර්ගගත ක්‍රියාවලිය අනිවාර්ය කෙරෙන බවත්, කම්කරු දෙපාර්තමේන්තුවේ සේවාවන් කාර්යක්ෂමව සහ කඩිනම් ව ඉටුකර දී මහජනතාව පත්වන අපහසුතාවන් අවම කිරීමට මෙමගින් බලාපොරාත්තු වන බව වැඩිදුරටත් කියා සිටී.

newsmania.lk

මෙන්න බලන්න තවත් පුවත්