ඉන්ධන මිල ඉහළ දමනවාද, නැද්ද යන තීරණය මුදල් අමාත්‍යවරයා විසින් ගනු ඇති බව බලශක්ති අමාත්‍ය උදය ගම්මන්පිල ප්‍රකාශ කර සිටිනවා.

අද (09) පෙරවරුවේ බලශක්ති අමාත්‍යාංශයේ පැවති මාධ්‍ය හමුවකදී අමාත්‍යවරයා මේ බව සඳහන් කර සිටියා.

“පහුගිය කාලයේ භූමිතෙල් සඳහා තිබෙන ඉල්ලුම දෙගුණයකින් ඉහළ ගොස් තිබෙනවා. ඒකට පළමු හේතුව තමයි ඩීසල් ලීටරයක් අපි රු 111කට විකුණන කොට භූමිතෙල් ලීටරයක් විකුණන්නේ රු 77කට. මේ නිසා කර්මාන්ත ශාලාවල යන්ත්‍ර සූත්‍ර බෝට්ටු පමණක් නෙමෙයි බස්රථ පවා මේ දවස්වල භූමිතෙල්වලින් දුවන්න පටන් අරන් තියෙනවා. ගෑස් සහ භූමිතෙල් අතර පවතින දැවැන්ත මිල පරතරය නිසා ගෑස් උඳුන්වලින් ආහාර පිසීම වෙනුවට භූමිතෙල් උඳුන් ඒ සඳහා භාවිත කරන්න ජනතාව පෙළඹිලා. අපි මේ දිනවල ගොවි ප්‍රජාව හා ධීවර ප්‍රජාව නොමැති ප්‍රදේශවල භූමිතෙල් නිකුත් කිරීම පාලනයක් සහිතවයි කරන්නේ.”

මාධ්‍යවේදියා- තෙල් මිල සම්බන්ධයෙනුත් ප්‍රශ්නයක් තියෙනවා ?

“ජනතාව දැවැන්ත පීඩාවකින් සිටින නිසා, ගහෙන් වැටුණ මිනිහා ට ගොනා ඇනීම සිදුනොවිය යුතුයි කියලා හිතලා තමයි දැවැන්ත පාඩුවක් දරමින් ඉන්ධන මිල වැඩිකිරීමක් සිදුනොකළේ. නමුත් මේ අයවැය මාසයේ ඉන්ධන මිල තීරණය කිරීම මුදල් අමාත්‍යතුමාට භාරයි.” උදය ගම්මන්පිල ඇමතිවරයා කියා සිටියේ.

මිල පාලනයක් පවත්වාගත නොහැකි තත්ත්වයකට මේ වන විට ආණ්ඩුව පත් ව ඇති බවත් පවතින ඩොලර් අර්බුදය ඊට හේතු වී ඇති බවයි අමාත්‍යවරයා සඳහන් කළේ.

“මේ ඩොලර් නැති හින්දා තමයි ගෑස්, කිරිපිටි, සිමෙන්ති හිඟය ඇති වෙන්නේ ආණ්ඩුවට මිල පාලනය පවත්වාගෙන යන්න බැරි වෙලා තියෙනවා. එතකොට ඩොලර් හිඟයෙන් ඩොලර් දුප්පත්කමෙන් ආණ්ඩුව පෙළීම නිසා ආණ්ඩුව ත් දැන් වලිගය නැති ගොනා වැනී,” යනුවෙන් අමාත්‍යවරයා සඳහන් කළේ.

 

මෙන්න බලන්න තවත් පුවත්