කොළඹ කොටුව දුම්රිය ස්ථානය ඉදිරිපිට ගුවන් පාලමේ ස්ථාන රැසක් දිරාපත් වීමෙන් කඩා වැටීමේ අවදානමක පවතී.
මේ හේතුවෙන් නුදුරේ දීම විශාල අනතුරක් සිදුවිය හැකි බවත් මෙම තත්ත්වය පිළිබඳ අවස්ථා රැසකදීම කොළඹ මහ නගර සභාව දැනුම්වත් කළත් මෙතෙක් එය ප්‍රතිසංස්කරණය කිරීමට හෝ නඩත්තු කිරීමට කිසිදු පියවරක් ගෙන නැති බවත් කොළඹ මධ්‍යම කොට්ඨාසයේ උසස් පොලිස් නිලධාරියෙකු සඳහන් කළේය.
ඊයේ (25 වැනිදා) සිට දුම්රිය ධාවනය ආරම්භ කරන හෙයින් දහස් සංඛ්‍යාත පිරිසක් දෙනාම මෙම පාලම ඔස්සේ ගමන් කරනු ඇති බවත් ඇතැම් අවස්ථාවලදී සාරි පැලඳ රාජකාරි සඳහා යන කාන්තාවන්ගේ දිරාපත් යකඩවල ගෑවීමෙන් එම කතුන් අනතුරුවලට ද ලක්ව තිබෙන බවත් එම නිලධාරියා කීවේය. මේ වනවිට අවදානම් ස්ථානවල සිමෙන්ති ගල් යොදා ඇත. විශාල පිරිසක් එකවර පාලම මතින් ඇවිදීමෙන් එය කඩා වැටීමට ලක්විය හැකි බව පොලිසිය පවසයි.
පවතින අවදානම් තත්ත්වය හමුවේ පාලම වසා දමා ප්‍රතිසංස්කරණය කිරීමට කටයුතු කරන්නේ නම් රථවාහන පාලනය කරමින් මාර්ග සැලැස්මක් යෙදවීමට පොලිසිය සූදානමින් සිටී.
කොළඹ නාගරික කොමසාරිස් රෝෂිනී දිසානායකගෙන් මේ පිළිබඳ අරුණ කළ විමසුමකදී සඳහන් කළේ එවන් අනතුරුදායක තත්ත්වයක් ගැන නගර සභාවේ ඉංජිනේරුවරුන් දැනුවත් නොමැති බවය. මෙම ගුවන් පාලම 2015 වසරේ දී ලෝක බැංකු ව්‍යාපෘතිය යටතේ අලුත්වැඩියා කර කොළඹ මහ නගර සභාව වෙත බාර දී තිබේ. එහි පවතින වත්මන් තත්ත්වය ගැන තමන් කඩිනමින් සොයා බලන බවත් ඇය කියයි.
